Digər Xəbərlər
Şuşa rayonunda 5 nəfərin ölümü ilə nəticələnən yol qəzası baş verib
Şuşa rayonunda 5 nəfərin ölümü ilə nəticələnən yol qəzası baş verib.
APA-nın Qarabağ bürosu xəbər verir ki, hadisə rayonun Daşaltı kəndində qeydə alınıb.
Elvin Abbasovun idarə etdiyi "Nissan Navara" markalı avtomobil noyabrın 4-də, axşam saatlarında idarəetmənin itməsi nəticəsində yoldan çıxaraq aşıb və avtomobildən yanğın baş verib. Nəticədə avtomobildə olan sərnişinlər Kamil Qaybalıyev, Rəşad Atakişiyev, Şahbaz İsayev, Eldəniz Həsənov, Hümbət Hümbətov hadisə yerində yanaraq ölüblər.
Sürücü isə ağır yanıq xəsarətləri ilə Füzuli rayon mərkəzi xəstəxanasına yerləşdirilib.
DİN-in Mətbuat xidmətinin Bərdə regional qrupunun baş inspektoru, polis kapitanı Aslan Qiyaslı APA-ya faktı təsdiqləyib. Bildirib ki, baṣ vermiş yol-nəqliyyat hadisəsi ilə əlaqədar Şuşa Rayon Polis Şöbəsində araşdırmalara başlanılıb. Hazırda istintaq davam etdirilir.
Qeyd edək ki, qəzaya düşənlər işğaldan azad edilən ərazidə fəaliyyət göstərən yol tikinti şirkətlərinin birinin əməkdaşlarıdır.
Şuşada baş vermiş qəza hadisəsi zamanı xəsarət almış Sabirabad rayon sakini noyabrın 4-də, saat 22:00 radələrində təcili və təxirəsalınmaz tibbi yardım avtomobili vasitəsilə Füzuli Rayon Mərkəzi Xəstəxanasının Təcili tibbi yardım bölməsinə gətirilib.
Pasiyentin vəziyyəti ağır olduğu üçün ilkin yardım göstərildikdən sonra dərhal Nərimanov Tibb Mərkəzinin tabeliyində olan Yanıq Mərkəzinə təxliyə edilib. Yanıq Mərkəzinin Reanimasiya şöbəsinə yerləşdirilən pasiyentə sifətin, bədənin müxtəlif nahiyələrinin 3-cü və 4-cü dərəcəli yanığı nəticəsində yanıq şoku, eyni zamanda sağ said sümüyünün sınığı və çıxığı diaqnozu qoyulub.
Hazırda pasiyentin vəziyyəti ağır olaraq qiymətləndirilir və Reanimasiya şöbəsində müalicəsi davam etdirilir.
Baxış sayı: 7589 | Tarix: 06.11.2023
Bizi Telegramda izləyin: @repostaz
