Deputatdan Tarif Şurasına müraciət: Xalqın boğazından tutmaq olmaz

Millət vəkili Yevda Abramov Milli Məclisdə büdcə müzakirəsi zamanı sərt çıxış edib.

RePost.Az “Qafqazinfo”ya istinadən xəbər verir ki, millət vəkili çıxışında həmişə xalqın dərdini Milli Məclisin tribunasına gətirdiyini qeyd edib: “Kimisə tənqid etmişəmsə, bu şəxsi qərəzlə bağlı olmayıb. Birinci Tarif Şurası ilə bağlı demək istəyirəm. Bu şura hansı arqumentləri əsas götürüb işığın, qazın qiymətini qaldırır? Orada heç olmasa, bir millət vəkili təmsil olunmalı deyilmi? Heç olmasa, onu qaldıranlar bunun səbəbini izah etsin. Mən bu artımla heç razı deyiləm.

Deyirlər ki, 62 faiz əhaliyə təsir göstərməyəcək. Mən bu rəqəmə inanmıram. Bu rəqəm cənab prezidentin apardığı uğurlu iqtisadi siyasətin nəticələri ilə düz gəlmir. Çünki cənab prezident hər dəfə çıxışında deyir ki, yoxsulluq rəqəmləri aşağı düşüb. Amma əhalinin yoxsulluq faizi hələ də çoxdur. Ona görə də qazı və işığı çox yandırırlar. Təklifim budur: Geriyə yol yoxdur. Amma çıxış yolları var.

İndi “300 milyon əlavə olunacaq” deyirlər. Düzdür o pulu tapmaq olar, böyük rəqəm deyil. Bu pulu komitə və nazirliklərdən dotasiya şəklində də götürmək olar. Kvotanı ikiqat artırmaq olar. Yığım faizini çoxaltmaqla bu bəladan qurtulmaq olar. Qaz və işıqla bağlı qərar elə bir zamanda qəbul olunub ki, bu gün Qubaya 20 sm qar yağıb. Şaxta 10-12 dərəcədir.

Belə bir zamanda xalqın boğazından tutmaq, xalqı çətinliyə salmaq düzgün deyil. Xalq referendumun təsiri altında yaşayır.

Xalq referenduma deyil, prezidentə səs verdi. Qubada və digər regionlarda cənab prezidentə necə bir sevginin olduğunun mən şahidi oldum. Oqtay müəllim, bu sadəcə referendum deyildi, prezidentin yenidən seçilməsi idi. Amma məmurlarımız belə ciddi qərarları qəbul edərkən doğrudanmı xalqı düşünürlər? Mən buna tam şübhə ilə baxıram.

Bundan əlavə, bu gün ölkənin valyuta bazarına ciddi süni müdaxilələr var. Mən bunu gözümlə “Xalqlar dostluğu” , “28 May” metrosu və Quba bazarında görmüşəm. Eyni gündə 4 saatın içində dollar 5 manat fərqlə satıldı və alındı. Həmin insanların xüsusi maşınlarının arxa hissəsində kisələrlə dollar hardandır? Bu pullar onların əlinə necə düşüb? Mən buna məəttəl qalmışam. Kim diktə edir bu qara bazara? Belə olacaqdısa, biz valyuta dəyişmə məntəqələrini niyə ləğv etdik? Xaricdə bir avronu dəyişmək üçün pasportumuzu təqdim edirik. Orada ad familiyamız yazılır. Bu qədər insanları işsiz qoyduq. Qara bazarda möhtəkərlik üçün daha da geniş imkanlar açdıq. Onsuz da valyuta dəyişmə məntəqələrini ləğv etmək effekt vermədi.

Eyni şəraiti Rusiya da keçirib. Amma Rusiya da bu xəstəliyi bu cür keçirmədi. Bu böhran deyil, neft ölkələrini çökdürmək üçün güclü dövlətlərin işi idi. Ona görə biz hərəkət etrməliydik, kənara çəkilməli deyildik. Bu gün üçün səriştəlilik göstərməli idik. Mən büdcə layihəsinə səs verib düyməni basarkən arzu edəcəm ki, büdcəmizdən haram əllər yox olsun. Amma bunun nə xeyri? Yenə həmin insanlar həmin əməllər yerinə yetiriləcək. Xalq biz deputatlardan çox şey gözləyir, danışmamaq da olmur.

Elə-belə də burada gəlib oturmaq olmur axı, Oqtay müəllim?

Mən bu gün büdcədən rayonum üçün pul istəmirəm. Bilirəm ki, ölkə başçısı demişkən, 2017- ci il ağır il olacaq. Amma elə məsələlər var ki, Azərbaycan məmurundan çox şey asılıdır. Mən demişəm ki, kim cənab prezidentə kömək etmirsə, bu ölkənin suyu və çörəyi haram olsun. Elə mən də onların içində olmaqla. Əl çəkmək lazımdır bu korrupsiyadan. Bu millətə yaxın durmaq lazımdır. Nə olar ki, bir-iki il yaxşı yaşamayaq, amma xalqın yanında olaq. İnsanın dəniz kənarında, dağın başında nə qədər villası olar?

Qonaqkənddə nazirlərin, komitə sədrlərinin mal-qaraları qışlağa gedir. Çobandan soruşursan ki, bunlar kimindir. Nazirlərin adına kimi deyir. Mən indi burada ad çəkmək istəmirəm”.

RePost.Az