Azərbaycanda son 3 gündə 20 nəfər öldü, 11 nəfər yaralandı

2017-ci il də dünyada qanlı terror hücumları ilə başlayıb. Türkiyədə, İraqda qanlı terror aktları törədilib. Azərbaycanda da yeni il qanlı-qadalı başlayıb, lakin bunun səbəbi terror deyil, "yol terroru”, yaxud piyadaların vurulması və ölümlə nəticələnən qəzaların intensivliyi, habelə məişət zəminində baş vermiş qətllər və intiharlardır.

 

Virtualaz.org DİN-in rəsmi xronikasına istinadən xəbər verir ki, 2017-ci ilin ilk 3 günü ərzində Azərbaycanda cəmi 19 nəfər yol qəzalarında həlak olub, qətlə yetirilib, intihar edib və bədbəxt hadisənin qurbanı olub. Belə ki, ilin ilk günləri ərzində Balakəndə avtomobil 1 piyadanı vuraraq öldürüb. Masallıda 2 nəfərin ölümü, 2 nəfərin yaralanması ilə nəticələnən avtomobil qəzası baş verib.

 

Beyləqanda 1 piyada avtomobillə vurularaq öldürülüb, Göyçayda baş vermiş avtomobil qəzasına 2 nəfər yaralanıb. Şamaxıda isə 1 nəfərin ölümü ilə nəticələnən qəza baş verib. Bərdədə 1 piyadanı maşın vurub öldürüb. Şəmkirdə 1 nəfər sürücü bədbəxt hadisənin qurbanı olub, 1 qadın qətlə yetirilib. Bakıda 2 nəfər (ər-arvad) dəm qazının güdazına gedib. Gədəbəydə oğul anasını döyərək qətlə yetirib. Xaçmazda 1 nəfər intihar edib. 

 

Ağstafada 2 nəfər-ana və qızını odlu silahla yaralayıblar. Beyləqanda 1 nəfərin cəsədi kanaldan tapılıb, əsas versiya intihardır.  Bakıda avtobuslar 2 nəfər piyadanı vurub öldürüb. Kürdəmirdə 1 nəfərin ölümü, 3 nəfərin yaralanması ilə nəticələnən qəza baş verib. Biləsuvarda 1 nəfər intihar edib, Ucarda 1 nəfər qəzada ölüb, Ağcabədidə isə daha 1 nəfər qəzanın qurbanı olub. Şirvanda isə azyaşlını avtomobil vurub və ağır yaralayıb.

 

Son məlumata görə Gəncədə daha bir intihar hadisəsi olub, bu şəhərdə 62 yaşlı qadın canına qıyıb. Şəmkirdə isə 18 yaşlı gənci bıçaqlayıblar.

 

Bu rəqəmləri quru statistika hesab etmək olardı. Ancaq nəzərə alanda ki, hər bir rəqəmin arxasında faciə dayanır, o zaman cəmi üç günün qəzada ölənlər, qətllər və intiharlar statistikasını dəhşətli hesab etmək olar...

 

RePost.Az