Bayrağımızı yandıran şəxsi yarışın təşkilatçılarından biridir

Xəbər verdiyimiz kimi, Ermənistanın paytaxtı İrəvanda keçirilən ağır atletika üzrə Avropa çempionatının açılış mərasimində Azərbaycanın dövlət bayrağı yandırılıb.

 

Bu barbarlığı dizayner kimi tanınan Aram Nikolyan həyata keçirib.

 

Hər şey düşünüldüyü kimi bir anda baş verməyib. Belə ki, bayrağımıza qarşı hörmətsizlik daha öncədən planlaşdırılıb. Yayılan fotolardan aydın olur ki, Aram Nikolyan açılış mərasiminin keçirildiyi Karen Dəmirçiyan adına idman-konsert kompleksinə hazırlıqlı gəlib. O, əvvəlcə əlində tutduğu yandırıcı maddəni bayrağın üzərinə tökür, daha sonra isə alışqanla dövlət atributumuza alov vurur.

 

Sözsüz ki, bu, təhlükəsizlik tədbirlərinin ciddi şəkildə təşkil olunmamasının göstəricisidir. Belə çıxır ki, boynunda akkreditasiyası olan Aram Nikolyanın əlində alışqan əvəzinə, silah da ola bilərdi.

 

Baş verən hadisə bir daha göstərir ki, Ermənistan ciddi idman tədbirlərinə ev sahibliyi etməyə hazır belə deyil.

 

Digər maraqlı məqam isə ondan ibarətdir ki, açılış mərasiminə Ermənistanın Baş naziri Nikol Paşinyan da qatılıb. Yəni, bu barbarlıq elə Paşinyanın gözü qarşısında baş verib.

 

O, utanmadan açılış mərasimində çıxışı zamanı deyib:

"Çempionat suveren müstəqil respublikanın himayəsi və bayrağı altında keçirilir. Ölkəmiz taleyin və tarixin yükünü götürməyə hazırdır".

 

Paşinyanın pafoslu çıxışının fonunda isə bütün dünya Ermənistanın bir bayrağın ağırlığı altında necə qaldığını görmüş oldu.

 

Bu məqamda 8 il əvvələ, Bakıda keçirilən Avropa Oyunlarına nəzər salmaqda fayda var. Belə ki, 2015-ci ildə paytaxtımızda keçirilən Birinci Avropa Oyunlarında boks üzrə medal qazanan Ukraynanı təmsil edən erməni idmançı azarkeşlər tərəfindən fitə basılsa da, Prezident İlham Əliyev bir jesti ilə buna qarşı çıxmışdı.

 

Ölkə başçısının addımı azarkeşlərin alqışları ilə müşayiət olunmuşdu.//Qafqazinfo/