Arif Hacılının oğlunun ittiham olunduğu maddələr açıqlandı - VİDEO

Ötən gün saxlanılan Müsavat partiyasının rəhbəri Arif Hacılının oğlu Orxan Hacılı təqsirləndirilən şəxs qismində istintaqa cəlb edilib.

 

“Qafqazinfo”nun əldə etdiyi məlumata görə, ona qarşı Cinayət Məcəlləsinin 263.1 (nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması, ehtiyatsızlıqdan zərərçəkmiş şəxsin sağlamlığına az ağır və ya ağır zərər dəydikdə) və 264-cü (yol-nəqliyyat hadisəsi yerindən qaçma) maddələri ilə ittiham elan edilib.

 

O.Hacılı barəsində hələ ki qətimkan tədbiri seçilməyib.

Qeyd edək, bir neçə gün öncə Orxan Hacılının Bakıda yol-nəqliyyat hadisəsi törətməsi barədə görüntülər yayılmışdı. Görüntülərdə “Honda” markalı avtomobilin manevr edəndə bir neçə avtomobilə çırpılması əks olunub. Sürücünün hadisə zamanı sərxoş olduğu bildirilsə də, A.Hacılı açıqlamasında bunu təkzib etmişdi.