“Gürcüstanda Azərbaycanla bağlı iş görənləri “vətən xaini" elan edirlər”- Amil Hacıyev

Uzun illər Azərbaycan teleməkanında və mətbuatda çalışan Amil Hacıyevi tanımayan çox az adam tapılar. Gürcüstan vətəndaşı olmasına baxmayaraq, o, Azərbaycan mediasında çalışdığı müddətdə öz dəsti-xətti seçilməyi bacardı. Lakin bir müddət əvvəl Amil Hacıyev öz fəaliyyətini davam etdirmək üçün Gürcüstana qayıtdı. RePost.Az onunla müsahibəni təqdim edir.

 

-Amil bəy, bir müddət əvvəl Gürcüstana qayıdacağınızı media vasitəsilə bəyan etdiniz. Gürcüstanda jurnalistlik fəaliyyətiniz davam etdirirsinizmi?

 

-Bəli. Artıq burada fəaliyyət göstərən “Kvemo Kartli” televiziyasında həftədə 5 gün olmaqla, Azərbaycan dilində efirə gedən xəbərlər proqramının aparıcısı olacam. Eyni zamanda burada müsahibələr hazırlayıb, Azərbaycan mediasına da göndərirəm. Amma bundan əlavə ilk günlərdə sayt yaratmaq barədə düşünürdüm. Son günlər burada müşahidə etdiyim bəzi məsələlər bu prossesin sürətləndirilməsini zəruri edir. Planım artıq saytla yekunlaşmır. Daha böyük bir layihə haqqında da düşünürəm.

 

-Yaradacağınız sayt xəbər saytı olacaq, yoxsa…

 

– Sayt xəbər portalı olacaqdı. Çünki burada nə qədər işlər görülsə də, azərbaycanlıların böyük əksəriyyəti gürcü dilini bilmir. Biz sırf Gürcüstan mediasında gedən xəbərləri, burada baş verən hadisələri yaymaq istəyirdik. Amma artıq bu sayt yaradacağım yeni təşkilatın bir hissəsi olacaq. Çünki hazırda Gürcüstanda Azərbaycan barədə, eləcə də Azərbaycanda Gürcüstan barədə çox zaman həqiqətə uyğun olmayan məlumatlar yayılır.

 

-Qeyd etdiniz ki, təşkilat yaradırsınız. Bu təşkilatın məqsəd və məramı nə olacaq?

 

– Gürcüstan- Azərbaycan Media Mərkəzinin əsas məqsədi iki ölkə mediası arasında əməkdaşlıq, fikir, təcrübə mübadiləsi aparmaq, dostluq əlaqələri yaratmaq və s. Amma başlıca məqsəd hər iki dövlətin həqiqətlərini yaymaqdır. Son zamanlar müşahidə etdim ki, Gürcüstanda iki dövlətin dostluq münasibətlərinə mane olan qüvvələr var. Bunlarla mübarizə üçün həqiqətləri yaymaq lazımdır. Gürcüstan haqqında, orada yaşayan soydaşlarımızın sosial problemlərini qabartmaq, media vasitəsilə onlara dəstək vemək istəyirəm. Eyni zamanda bu prosses Azərbaycandakı gürcülərlə bağlı da aparılacaq. Artıq təşkilatın təsis edilməsi istiqamətində iş aparırıq. Bunun üçün təbii ki, hər iki ölkədən dəstək almalıyam. Təkbaşına ediləsi iş deyil.

 

O cümlədən burada gənc jurnalistlər var. Onlar üçün treninqlər, kurslar təşkil etmək, Azərbaycan mediasında təcrübə keçməsinə yardım etmək istəyirəm. Planlar çoxdur. Çalışıb bütün gücümlə bu layihəni reaallaşdıracam.

 

-Nə kimi dəstəyi nəzərdə tutursunuz?

 

-Təbii, birinci dəstəyi həmkarlarımdan gözləyirəm. Birgə işləyib böyük işlər görə bilərik. Gürcüstan- Azərbaycan Media Mərkəzi olaraq, biz həmçinin bir kommersiya təşkilatı kimi də fəaliyyət göstərəcəyik. İstənilən sayt, hətta televiziyalar bura gəlmədən müsahibə və tədbirlərin işıqlandırılması üçün bizə müraciət edə bilər. Bütün sadaladığım layihələri həyata keçirmək üçün maddi dəstək olmalıdır. Bunun üçün artıq komanda formalaşdırırıq. Müxtəlif qrant layihələrinə müraciət edərək, bu işləri həyata keçirəcəyik. Azərbaycan tərəfindən, dostlarımızdan mənəvi dəstək gözləyirik. Burada işləməyə həvəsli gənclər var. Sadəcə, onlara meydan vermək lazımdır. Məqsədimiz həmçinin pərakəndə deyil, birgə çalışmaqdır.

 

Xocalı faciəsinin ildönümü ilə bağlı burada əksəriyyət təşkilatlar və gənclər əl-ələ verib tədbirlər planı hazırlayırlar. Hamısını da öz gücləri hesabına. Məni də dəvət ediblər. İnandırım sizi, vaxti ilə qrant alıb özləri üçün təşkilat yaradan adamlar indi qıraqdan bizi söyməklə məşğuldur. Onlar elə bilir ki, Azərbaycan tərəfi bu gənclərə yardım edir. Sadəcə, pul ala bilmədikləri üçün aralarında mənim də olduğum gəncləri qınayırlar. Artıq sapı özümüzdən olan baltalar ortaya çıxıb. Onlar Azərbaycanla bağlı iş görənləri “vətən xaini” elan edirlər. Buna baxmayaraq, məqsədim buradakı gənclərlə əl-ələ verib, iki ölkənin dostluğuna dəstək olmaq və burada yaşayan azərbaycanlıların problemlərinə yardım etməkdir.

 

RePost.Az