Digər Xəbərlər
Vahid Əhmədovun müsahibəsi qalmaqala səbəb oldu
16 aprel tarixində bloqer Mehman Hüseynov öz yutub kanalında deputat Vahid Əhmədovla müsahibəsinin videosunu yayımlayıb.
Vahid Əhmədovun Mehman Hüseynovun suallarını cavablandırması sosial şəbəkələrdə geniş yayılıb.
Daha sonra deputatın fikirləri ilə bağlı onun həmkarları açıqlamalar veriblər və bu cür müsahibəni qəbuledilməz adlandırıblar.
Deputat Fəzail Ağamalı iddia edib ki, bloqerin suallarının təsiri altına düşən həmkarı dövlətin həyata keçirmiş olduğu fundamental məsələlərə şübhə toxumu səpməyə çalışıb.
Deputat Razi Nurullayev bildirib ki, Vahid Əhmədovun tərbiyəsiz bir şəxsə (Mehman Hüseynov nəzərdə tutulur) müsahibə verməsini, orada deputatların aşağılanmasına rəvac verməsini şiddətlə qınayır.
Spikerin müavini Fəzail İbrahimli isə qeyd edib ki, əgər Vahid Əhmədov Milli Məclisi bəyənmirsə, burada oturmasın, mandatından imtina etsin.
MM sədri Sahibə Qafarova məsələyə İntizam Komissiyasında baxılacağını bildirib.
Vahid Əhmədov isə bildirib ki, bütün suallara cavab verməyə hazırdır:
“İstər Milli Məclis, istərsə də mətbuatdakı çıxışların da hansı mövqedə olduğu bəllidir. Bu çıxışların haradan idarə olunduğunu dəqiq bilirəm. Kim bu göstərişi verib, onu da bilirəm. Vaxtı gələndə bunun hamısı açılacaq. Fəzail Ağamalı təklif etdi ki, İntizam Komissiyasında baxılsın. Etiraz etmirəm, baxılsın. Orada da bütün suallara cavab verməyə hazıram. Milləti və dövlətinin yanında olan insanam”
Baxış sayı: 8900 | Tarix: 25.04.2023
Bizi Telegramda izləyin: @repostaz
